Chart of Accounts

На сметката 030 - Вложувања во подружници, се евидентираат акциите и уделите во капиталот на друштвата во кои друштвото кое известува има контрола, односно учество во капиталот преку 50% и/или други услови дефинирани во стандардите, и кои влегуваат во групата за консолидација.

На сметката 031 - Вложувања во придружни друштва и заеднички контролирани друштва (учество во заеднички вложувања) се евидентираат акциите и уделите во капиталот на придружно друштво во кои друштвото учествува од 20% до 50% и/или други услови дефинирани во стандардите, како и учеството во заеднички вложувања во кои учеството на друштвата во капиталот на друго друштво е 50% со 50%

На сметката 032 - Долгорочни заеми и кредити на поврзани друштва во земјата и странство, се евидентираат долгорочни кредити и заеми дадени на матични, заависни и други поврзани друштва спрема називот на оваа сметка.

На сметката 033 - Дадени заеми и кредити во земјата и во странство, се евидентираат дадените заеми и кредити на правни лица во земјата и во странство, освен оние дадени на матични, зависни и други поврзани друштва.

На сметката 034 - Финансиски средства кои се чуваат до доспевање, се евидентираат финансиските средства со фиксни или утврдени износи на плаќање и со фиксно доспевање, за кои друштвото има намера и способност да ги држи до доспевање.

На сметката 035 - Финансиски средства расположиви за продажба, се евидентираат оние средства кои се определени како расположливи за продажба во согласност со сметководствената политика.

На сметката 036 – Финансиски средства според објективна вредност преку добивката или загубата, се евидентираат финансиските средства кои при почетното признавање се определени како финансиски средства по објективна вредност преку добивката или загубата, освен некотираните сопственички инструменти и оние финансиски инструменти кои немаат котирана пазарна цена и чијашто објективна вредност не може реално да се измери.

На сметката 037 – Дадени депозити и кауции во земјата и странство, се евидентираат дадените долгорочни депозити од деловните активности, депозитите кај деловните банки, депозитите кај осигурителните компании, судските депозити и друго, како и дадените долгорочни кауции за обврски, дадени кауции врз основа на купопродажни односи, дадени кауции за плаќања и други дадени кауции и капари.

На сметката 038 - Останати долгорочни финансиски средства, се евидентираат вложувања во инвестициони фондови и останати долгорочни средства.

На сметката 039 - Вредносно усогласување на долгорочните финансиски средства, се евидентира пресметаното вредносно усогласување на долгорочните финансиски средства во согласност со МСС 36 и МСС 39. Друштвото обезбедува аналитичка евиденција по основните сметки од оваа група на сметки.