Chart of Accounts

На сметките од групата 05 - Одложени даночни средства, се евидентираат одложените даночни средства во согласност со МСС 12 и други релевантни стандарди и оддел 29 и други релевантни оддели на меѓународниот стандард за финансиско известување за мали и средни субјекти.

На сметката 050 - Одложени даночни средства се евидентира износот на данокот на добивка кој може да се поврати во наредните периоди врз основа на привремени одбитни разлики, неискористени даночни загуби или пренесени неискористени даночни кредити.

​

На сметките од групата 10 - Парични средства и парични еквиваленти, се евидентираат паричните средства во благајната, на сметките кај деловните банки, депозитите по видување, благородните метали и предметите од благородни метали и краткорочните и високо ликвидни вложувања со рок на доспеаност до три месеци или помалку, од датумот на стекнување и се со безначаен ризик од намалување на вредност.

На сметката 100 – Парични средства на трансакциски сметки во денари, се евидентираат денарските паричните средства на трансакциските сметки (друштвото оваа сметка ја расчленува согласно бројот на отворени трансакциски сметки кај банките), како и искористените рамковни кредити.

На сметката 101 - Издвоени парични средства и акредитиви, се евидентираат средствата издвоени на посебни сметки кај банките за отворени акредитиви во земјата, за исплата на чекови, за инвестиции и за други намени.

На сметката 102 - Парични средства во благајна, се евидентираат состојбата и уплати и исплати на готовина на главната благајна, благајната на продавница, благајна на сервисот и останатите видови благајна во зависност на дејноста на друштвото. Друштвото во рамки на ова сметка по потреба води преодна сметка за благајната на продавница.

На сметката 103 - Девизни сметки, се евидентира состојбата и промените на парични средства на сметките во странска валута. Друштвото оваа сметка ја расчленува во зависност од намената на сметката.

На сметката 104 - Девизни акредитиви, се евидентираат отворените девизни акредитиви кај банките за плаќања во странство.

На сметката 105 - Парични средства во благајна во странска валута, се евидентира состојбата, уплатите и исплатите на ефективни странски парични средства за службени патувања во странство, за трошоци поврзани со транспортот на стоката во странство, за менувачки работи и слично.